هل تحتاج القطط للتحميم؟

هذا سؤال يتكرر كثير بين مربي القطط، خصوصًا اللي توهم بادين في تربية هالمخلوقات الجميلة. وعلشان كذا، قررت أكتب لكم كل اللي أعرفه عن هالموضوع، بطريقة بسيطة وواضحة وتناسب الجميع.

طبيعة القطط والنظافة

القطط بطبعها نظيفة جداً، وتحب تلعق جسمها وفروها بشكل يومي، وتعتبر من أنظف الحيوانات. في الغالب، ما تحتاج قطتك تستحم لأنها تنظف نفسها بنفسها، لكن في حالات معينة، ممكن التحميم يكون ضروري.

متى تحتاج تحمم قطك؟

فيه حالات تستدعي فعلاً أنك تحمم قطك، ومنها:

لو اتسخ بفروه شي ما يقدر يشيله بنفسه مثل الطين، الدهون، أو مواد لزجة.
إذا كان يعاني من طفيليات مثل البراغيث أو القراد، واحتاج شامبو علاجي.
في حال وجود مشاكل جلدية مثل الحكة أو القشرة، وغالبًا الطبيب البيطري راح يوصي باستخدام شامبو خاص.
في بعض أنواع القطط طويلة الشعر، ممكن يعلق في فروها أوساخ أو براز، ووقتها تحتاج تنظيف.
إذا ظل لفترة طويلة بدون نظافة، خصوصًا لو ما يعتني بنفسه زين بسبب المرض أو الكِبر.

كم مرة تحتاج القطط للاستحمام؟

إذا كانت القطة سليمة، تعيش داخل البيت، ونظيفة بطبعها، ما تحتاج تستحم إلا نادراً. التوصية العامة تقول: مرة كل ٣ إلى ٦ شهور تكفي، بشرط يكون فيه سبب واضح. المبالغة في تحميم القطط ممكن يضر بشرتها ويسبب جفاف.

أخطاء شائعة أثناء التحميم

استخدام شامبو غير مخصص للقطط مثل شامبو البشر.
استخدام ماء بارد أو حار جدًا.
وضع الماء مباشرة على وجه أو رأس القط.
الاستحمام المتكرر بدون داعي.

ما هي البدائل عن التحميم؟

في بعض الأحيان، ما يحتاج تتحمم القطة، ويكفي تستخدم بدائل:

مناديل مبللة مخصصة للقطط.
شامبو جاف أو بخاخات تنظيف آمنة.
فرشاة تنظيف مع قليل من الماء الفاتر.

كيف تحمم قطك بطريقة آمنة؟

اختَر مكان مريح، مثل حوض صغير أو وعاء بلاستيك.
استخدم ماء دافئ، لا بارد ولا حار.
استعمل شامبو مخصص للقطط.
بعد الشاور، نشّف القط بمنشفة ناعمة، أو باستخدام مجفف على وضع هادئ.

أسئلة شائعة

س: هل أقدر أستخدم شامبو بشري؟
ج: لا. لأن تركيبة شامبو البشر تختلف تماماً عن احتياج بشرة القطط، وممكن تسبب تهيّج وجفاف.

س: قطّي يكره الموية، وش أسوي؟
ج: عودّه شوي شوي. ابدأ بتبليل أقدامه فقط، وبعدين تدرج بالتبليل. واستخدم البدائل إذا حسيت أنه متوتر.

نصيحة مهمة

التدريب على الاستحمام يحتاج صبر، لا تستعجل، ولا تضغط على القطة. خلي العملية بسيطة وهادئة قدر الإمكان. ولا تنسى تكافئ قطك بعد الشاور عشان يتعود إنها تجربة حلوة.

زبدة الكلام:

القطط مخلوقات نظيفة بطبيعتها، والتحميم ما هو ضروري. إلا في الحالات الخاصة مثل الطفيليات أو الأوساخ الشديدة أو المشاكل الجلدية. راقب قطك، وإذا لاحظت أنه مرتاح ونظيف، خله في حاله. وإذا احتجت تحممه، سوها بطريقة لطيفة، واقترح عليك قراءة هذه التدوينة بعنوان كيف تحمم قطّك بدون ما تسوي معركة؟ فيها خطوات عملية ونصايح تخلي تحميم قطك تجربة أهون وأقل توتر.

ولاتنسى تضيفني في مواقع التواصل الإجتماعي